ស្នៀតការពារ ទាកាច់បំបាក់ (មេគុនទា)
លើសពីស្នៀតរង គុនល្បុក្កតោក៏បង្រៀនឲ្យយើងចេះការពារខ្លួន ដោយប្រើប្រាស់ការវាយលុករបស់ដៃគូ មកធ្វើជាអាវុធវាយបកវិញបានផងដែរ។ ឧទាហរណ៍ រាល់ពេលដែលដៃគូទាត់ចូល កីឡាករយើងអាចជ្រើសរើសយកការលើកជើងរង ឬយកដៃក្រៀកចាប់ ហើយវាយលុកតបវិញដូចក្នុងរូបភាពនេះ។
សិក្សាពីស្នៀតការពារនេះ
ក្នុងរូបភាពនេះ កីឡាករិនីរបស់យើង កំពុងអនុវត្តស្នៀតមួយក្នុងចំណោមមេគុនសត្វទា ដែលមានឈ្មោះតាំងពីបុរាណកាលមកថា “ទាកាច់បំបាក់”។ ក្នុងស្នៀតនេះ បើត្រូវគេទាត់ខាងឆ្វេង ត្រូវក្រៀកខាងឆ្វេង បើត្រូវគេទាត់ស្តាំ ត្រូវក្រៀកខាងស្តាំ។ ក្រោយពេលក្រៀករួចរាល់ ត្រូវប្រើប្រាស់កែង វាយលុកចំភ្លៅរបស់ដៃគូ (វាយលុកសាច់ដុំដែលស្រួលធ្វើឲ្យដៃគូរមួល)។
ជំហសត្វ និងដំណើរសត្វទាំងអស់ដែលមាននៅក្នុងគុនល្បុកតោ រួមមានជំហសេះ បក្សី បក្សីសកស្លាប បក្សីទទះស្លាប នាគព័ន្ធ ដំណើរបក្សី ដំណើរនាគ ដំណើរទា និងជំហទា នេះបើយោងតាមកំណត់ត្រាដែលដកស្រង់ចេញពីសៀវភៅ “គុនល្បុក្កតោថ្នាក់ក្រម៉ា “ស” ចងក្រងដោយលោកគ្រូ សាន គីមស៊ាន ត្រឹមទំព័រទី ១០១ ដល់ទំព័រទី ១៦០។
ប្រភព៖
- ការផ្តល់បទសម្ភាសន៍ផ្ទាល់ពីកញ្ញាសំ ថារ័ត្ន (កីឡាការិនីល្បុក្ក តោរបស់កម្ពុជា)
- សៀវភៅ “គុនល្បុក្កតោថ្នាក់ក្រម៉ា “ស” ដោយលោកគ្រូ សាន គីមស៊ាន